返母校同師弟妹分享工作同人生經歷👩🏻🏫
諗返起以前成日比老師罰...
原來人生真係冇嘢冇可能😛
近幾年先識我嘅朋友
好多都覺得我中學應該好乖
係好專心上堂嗰啲學生
事實上係相反
中學嗰陣我成日比人點名要罰企罰留堂
因為上堂掛住傾偈同玩
一唔係就偷偷地食嘢同瞓覺
考試測驗永遠都係臨急抱佛腳
不過好多嘢都只係百厭
唔鍾意守規矩
冇做過啲咩壞事傷害人
仲可以話係純品添（講真😂老師都係咁講，成日擔心我會比人呃）
通常啲人聽到呢到就會話，睇你唔似喎...
我諗係因為喺中學呢個環境入面
我係最放心自在
可以盡情做返自己
呢度嘅老師同同學都充滿愛
你會知道無論點
佢哋都會包容、接納同愛你
出咗社會之後
慢慢發現原來愛並唔係理所當然
下下打開個心
好容易會受傷
有時就算咩都冇做都會中槍
所以變得愈嚟愈內向
唔想亂講嘢得罪人
寧願乖乖坐埋一邊
每次諗返起中學
我都會好感恩入咗一間咁有愛嘅中學
呢度未必係成績最好嘅學校
但絕對係老師最好嘅學校
喺呢到我有一段好美好嘅中學回憶
最好嘅好朋友都係呢度認識
最重要係信仰都係由呢度開始
所以每次提起母校我都覺得好自豪
就係呢一切一切成就今日嘅馮寶欣❤️
Search